काठमाडौं । नेपाली कांग्रेसका सहमहामन्त्री रामहरि खतिवडाले प्रदेश र स्थानीय तहको निर्वाचन एकैपटक गर्न प्रस्ताव गरेका छन् । निर्वाचनमा हुने ठूलो आर्थिक खर्च न्यूनीकरण गर्न दुवै तहको निर्वाचन एकै समयमा गर्नुपर्ने उनको धारणा छ ।
सामाजिक सञ्जालमार्फत आफ्नो धारणा सार्वजनिक गर्दै खतिवडाले प्रत्येक वर्ष निर्वाचन गराउँदा राज्यको अर्बौं रुपैयाँ खर्च हुने भन्दै मुलुकको आर्थिक क्षमतालाई ध्यानमा राखेर निर्वाचन प्रणाली र समयतालिकाबारे पुनर्विचार गर्नुपर्ने बताएका हुन् ।
‘सबै राजनीतिक पार्टीलाई अपिल गर्न चाहन्छु । प्रदेशको र स्थानीय तहको चुनाव सँगै गरौँ । प्रत्येक वर्ष चुनाव गराएर अर्बौं खर्च गर्ने हाम्रो हैसियत छैन’ खतिवडाले लेखेका छन् ।
उनले अहिले स्थानीय तहको निर्वाचन, त्यसको केही समयपछि प्रदेश निर्वाचन र फेरि राष्ट्रिय सभा निर्वाचन गर्नुपर्ने अवस्थाले राज्यलाई निरन्तर आर्थिक भार पर्ने संकेत गरेका छन् ।
निर्वाचन लोकतन्त्रको महत्वपूर्ण आधार भए पनि त्यसको व्यवस्थापनमा हुने खर्चलाई समेत ध्यान दिनुपर्ने खतिवडाको प्रस्ताव छ । प्रदेश र स्थानीय तहको निर्वाचन एकैपटक गर्दा राज्यको खर्च घट्नुका साथै निर्वाचन व्यवस्थापनमा लाग्ने समय, स्रोत र जनशक्तिको समेत बचत हुने उनको तर्क देखिन्छ ।
खतिवडाको प्रस्तावले निर्वाचनको समयतालिका, संवैधानिक व्यवस्था र राजनीतिक दलहरूबीचको सहमतिबारे नयाँ बहस सिर्जना गर्ने देखिन्छ ।








प्रतिक्रिया