ओखलढुंगाको सुनकोशी गाउँपालिकामा तीन लाख ३३ हजार ३३३ रुपैयाँ पुरस्कार राशिको ‘सुनकोशी गाउँपालिका कप–२०८३’ आयोजना हुने भएको छ ।
गाउँपालिकाको आयोजनामा आगामी मंसिर २१ देखि २४ गतेसम्म अन्तरपालिका पुरुष फुटबल प्रतियोगिता सञ्चालन हुन लागेको हो ।
‘संस्कृति, पर्यटन, कृषि र पूर्वाधार: समावेशी सुनकोशी समृद्धिको आधार’ भन्ने नारासहित आयोजना हुने प्रतियोगिता सुनकोशी गाउँपालिका–५, मूलखर्कस्थित खेलमैदानमा सञ्चालन हुनेछ । प्रतियोगितामा सहभागी हुन गाउँपालिकाले देशभरका स्थानीय तहलाई आह्वान गरेको छ ।
प्रमुख प्रशासकीय अधिकृत लोकेन्द्रबहादुर राईका अनुसार प्रतियोगितामा सहभागी हुन इच्छुक टिमले मंसिर १८ गतेभित्र टिम दर्ता गरिसक्नुपर्नेछ । टिम दर्ता शुल्क १० हजार रुपैयाँ, बीमा शुल्क एक हजार रुपैयाँ र धरौटी दुई हजार रुपैयाँ निर्धारण गरिएको छ ।
प्रतियोगिता ९ ए साइडमा फिफाको नियमअनुसार नकआउट प्रणालीमा सञ्चालन हुनेछ । प्रत्येक टिममा १४ जना खेलाडी, एक जना प्रशिक्षक र एक जना व्यवस्थापक गरी १६ जना रहनेछन् । प्रत्येक नगरपालिका वा गाउँपालिकाबाट एक टिमले मात्र सहभागिता जनाउन पाउनेछन् भने सहभागी खेलाडी सम्बन्धित स्थानीय तहकै हुनुपर्नेछ ।
प्रतियोगिताको विजेताले तीन लाख ३३ हजार ३३३ रुपैयाँ नगदसहित ट्रफी, मेडल र प्रमाणपत्र प्राप्त गर्नेछ । उपविजेताले एक लाख ७७ हजार ७७७ रुपैयाँ प्राप्त गर्दा सेमिफाइनलसम्म पुग्ने अन्य दुई टिमले जनही एक लाख रुपैयाँ नगदसहित मेडल र प्रमाणपत्र पाउनेछन् ।
त्यस्तै, प्रतियोगिताका उत्कृष्ट खेलाडी, उत्कृष्ट गोलकिपर र सर्वाधिक गोलकर्तालाई जनही १० हजार रुपैयाँ नगदसहित ट्रफी, मेडल र प्रमाणपत्र प्रदान गरिने आयोजकले जनाएको छ । प्रतियोगिताले अन्तरपालिका स्तरमा फुटबल खेलको विकास, खेलाडीको प्रतिभा पहिचान तथा खेल पर्यटन प्रवद्र्धनमा सहयोग पुग्ने गाउँपालिकाको अपेक्षा रहेको छ ।
विगत वर्षहरुमा अध्यक्ष कपका नामले सञ्चालन हुने प्रतियोगिता यसवर्षबाट सुनकोसी गाउँपालिका कप भनेर सञ्चालन हुनेछ ।
प्रतियोगिताका लागि पालिकले १५ लाख रकम विनियोजन गरेको छ ।
प्रतिक्रिया