आउँदो आईतबार हुने स्थानिय तह उपनिर्वाचनको लागि आज राति १२ बजेदेखि मौन अवधि शुरू हुँदैछ । मतदानको समय भन्दा ४८ घण्टा अघि मौन अवधि शुरू हुने भएकाले भोलिदेखि दल र उम्मेदवारहरुले चुनावी प्रचार गर्न पाउँदैनन् । अब राजनीतिक दल र उम्मेदवाहरूलाई प्रचारप्रसारको लागि आजको दिन मात्रै बाँकी छ ।

नगरपालिका र गाउँपालिकाको मेयर, उपमेयर तथा अध्यक्ष, उपाध्यक्ष र वडा अध्यक्ष गरी ४१ पदका लागि ३ सय ७६ जनाले उम्मेदवारी दिएका छन् । २० राजनीतिक दल र स्वतन्त्र उम्मेदवार समेत ३ सय ७६ जनाको उम्मेदवारी कायम भएको निर्वाचन आयोगले जनाएको छ ।

आईतबार ओखलढुंगाको मोलुङ गाउँपालिका–५ मा वडा अध्यक्षका लागि मतदान हुदै छ । वडा अध्यक्षका लागि छ जना उम्मेदवार विच चुनावी प्रतिस्पर्धा हुदैछ ।

नेपाली कांग्रेसबाट घनश्याम दाहाल, नेकपा एमालेबाट गंगाबहादुर तामाङ, नेकपा माओवादी केन्द्रबाट मानबहादुर सुनुवार, राष्ट्रिय स्वतन्त्र पार्टीबाट बिष्णुप्रसाद पोखरेल, राष्ट्रिय प्रजातन्त्र पार्टीबाट चन्द्रमणी दाहाल र जनता समाजवादी पार्टीबाट इन्द्रबहादुर दर्जीले वडा अध्यक्षका लागि उम्मेदवारी दिएका छन् ।

यही मङ्शिर १६ गते आईतबार हुने उपनिर्वाचनलाई स्वच्छ, स्वतन्त्र, निष्पक्ष, विश्वसनीय र भय रहित शान्तिपुर्ण वातावरणमा सम्पन्न गर्न सुरक्षा व्यवस्था कडाई गरिएको छ । उपनिर्वाचनलाई लक्षित सुरक्षा योजनाको बनाएर शान्ति सुरक्षा व्यवस्थामा कडाई गरिएको हो ।

निर्वाचन स्थानिय तह र आसपासका क्षेत्रमा सुरक्षाकर्मी परिचालन गरिएको प्रमुख जिल्ला अधिकारी डा. नारायण ढकालले बताए । शान्ति सुरक्षलाई ध्यानमा राखेर मदिराको ओसार–पसार, बिक्री र प्रयोगमा पनि प्रतिबन्ध लगाइएको प्रमुख जिल्ला अधिकारी ढकालले बताए । निर्वाचन हुने क्षेत्रमा यातायातको सहज सञ्चालन तथा व्यवस्थापन गर्न सम्बन्धित स्थानिय तहलाई निर्देशन दिइएको प्रजिअ ढकालको भनाई छ ।

मतदानस्थलमा खानेपानी, शौचालय, विद्युत्, सञ्चार, आवजावतको वैकल्पिक मार्गका साथै ज्येष्ठ नागरिक, महिला तथा अपाङ्गतामैत्री बनाउन निर्देशन दिईएका जिल्ला प्रशासन कार्यालय ओखलढुंगाले जनाएको छ ।

जिल्ला समन्वय समिति प्रमुखका लागि नेपाली कांग्रेसको तर्फ बाट टेकराज भट्टराई निर्विरोध निर्वाचित भएका छन् । जिसस प्रमुख पदका लागि भट्टराईको एकल उम्मेदवारी परेको छ । आधिकारिक घोषणा हुन मात्र बाँकी छ ।

जिसस प्रमुख डिल्लीराम खनाल र मोलुङ गाउँपालिका–५ का वडाध्यक्ष गोपीकृष्ण कार्कीको निधन भए पछि उपनिर्वाचन हुन लागेको मुख्य निर्वाचन अधिकृतको कार्यालयले जनाएको छ ।