; ?>){kind=icon}
ओखलढुंगाकाे मानेभन्ज्याङ गाउँपालिकामा निर्वाचनका क्रममा ‘माटो’ चुनाव चिन्हमा भोट दिएको विषयलाई लिएर एक स्थानीयमाथि कुटपिट भएको घटना सार्वजनिक भएको छ ।
हालै सम्पन्न प्रतिनिधिसभा निर्वाचनमा श्रम संस्कृति पार्टीलाई मत दिएको आरोपमा मानेभन्ज्याङ गाउँपालिका–१ का ६० वर्षीय अशोक राईले सोही वडाका ५८ वर्षीय रामबली राईमाथि बिहीबार साँझ कुटपिट गरेको बताइएको छ ।
पूर्व गाविस अध्यक्ष समेत रहेका कांग्रेस नेता अशोक राईको कुटपिटबाट रामबली राई सामान्य घाइते भएका थिए ।
घटनापछि शुक्रबार बिहान स्थानीयबासीको सहभागीतामा दुवै पक्षबीच आपसी समझदारी मार्फत मेलमिलाप गरी विवाद समाधान गरिएको श्रम संस्कृति पार्टीका उम्मेदवार डा. उद्धव राईले जानकारी दिएका छन् । घटनाबारे उनले सामाजिक सञ्जाल मार्फत सार्वजनिक गरेका थिए ।
डा. राईले आफूलाई मन परेको उम्मेदवार तथा पार्टीलाई मत दिनु नागरिकको नैसर्गिक अधिकार भएको उल्लेख गर्दै यस्ता घटना निन्दनीय रहेको बताएका छन् । आगामी दिनमा यस्ता गतिविधि दोहोरिएमा कडा कदम चालिने उनले चेतावनी दिएका छन् ।
यता जिल्ला प्रहरी कार्यालय ओखलढुंगाका अनुसार घटनाबारे कुनै औपचारिक उजुरी परेको छैन ।
स्थानीय तहमा देखिने यस्ता विवादले निर्वाचनपछिको सामाजिक सद्भावमा असर पार्न सक्ने भन्दै सरोकारवालाहरूले संयमता अपनाउन आग्रह गरेका छन् ।
प्रतिक्रिया