ककनी गौरीवन सहकारी बचत ठगीः कोषाध्यक्ष नेम्वाङ पक्राउ

ककनी गौरीवन सहकारी बचत ठगीः कोषाध्यक्ष नेम्वाङ पक्राउ


भिजन समाचार
70.2k
Shares

बचतकर्ताको रकम ठगी आरोपमा ओखलढुंगा प्रहरीले थप एक जना पक्राउ गरेको छ । ककनी गौरीवन कृषि सहकारी संस्था लिमिटेडका कोषाध्यक्ष पाँचथर जिल्ला साबिक इङबुङ गाविस–१ हाल सिद्धिचरण नगरपालिका–१२ भैरबटोल ओखलढुंगा बस्ने ४८ वर्षिय नेत्रबहादुर नेम्वाङलाई प्रहरीले पक्राउ गरेको हो । उनी लामो समय देखी फरार थिए ।
जिल्ला प्रहरी कार्यालय ओखलढुंगा बाट खटिएको प्रहरी टोलीले कोषाध्यक्ष नेम्बाङलाई शुक्रबार सिद्धिचरण नगरपालिका–६ जन्तरखानीबाट पक्राउ गरेको प्रहरी निरिक्षक बालिस्टार सिंहले बताए । बचतकर्ताहरुको बचत रकम हिनामिना गरेको आरोपमा प्रहरीले यस अघि सहकारीका अध्यक्ष विनोद सुनुवार र उपाध्यक्ष पदमबहादुर खत्रीलाई पक्राउ गरिसकेको छ ।
पक्राउ परेका अध्यक्ष सुनुवार र उपाध्यक्ष खत्रि उपर प्रहरीले अनुसन्धान गरिरहेको छ । जिल्ला अदालतबाट थुनामा राखेर अनुसन्धान गर्न ६ दिनको म्याद लिइएको प्रहरी निरिक्षक सिंहको भनाई छ । पक्राउ परेको सहकारीका अध्यक्ष सुनुवार नेकपा माओवादी केन्द्र ओखलढुंगाका जिल्ला सचिव हुन् ।
जिल्लाको चम्पादेवी गाउँपालिका–९ विलन्दु स्थायी घर भएका सहकारीका अध्यक्ष सुनुवारलाई काठमाण्डौं महानगरपालिका–६ बौद्धबाट र मोलुङ गाउँपालिका–४ हर्कपुर ओखलढुंगाका पदम बहादुर खत्रीलाई घरैबाट बुधबार पक्राउ गरिएको प्रहरी निरीक्षक बालिष्टार सिंहले जानकारी दिए ।
बचतकर्ता मध्येका तिलक श्रेष्ठले गत मंसिर १५ गते सहकारीका सञ्चालक विरुद्ध जाहेरी दर्ता गरेका थिए । ककनी गौरीबन कृषी सहकारी संस्थामा बचत गरेको रकम झिक्न खोज्दा विभिन्न बहानामा सहरकारीका सञ्चालकले रकम फिर्ता नगरको भन्दै कानुन अनुसारका कारबाहीको माग गरेर बचतकर्ताहरुले जिल्ला प्रहरी कार्यालयमा उजुरी दिएका थिए ।
उजुरी प्राप्त भएपछि प्रहरीले उजुरीकर्ता र सहकारी सञ्चालकलाई समस्या समाधानका लागि जिल्ला प्रहरी कार्यालयमा छलफल गराएको थियो । एक साता भित्र बचतकर्ताको रकम फिर्ता गर्ने सहमति गरेका सहकारीका अध्यक्ष विनोद सुनुवारसहित सहकारीका पदाधिकारी रकम फिर्ता गर्नुको सट्टा सम्पर्क विहिन भएपछि प्रहरीले कानुनी प्रकृया अघि बढाएको थियो ।
अनौपचारिक सहमतिका आधारमा तोकिएको समयमा पनि बचतकर्ताको रकम फिर्ता नभएपछि अदालतले सहकारी सञ्चालक विरुद्ध पक्राउ पूर्जी जारी गरेको थियो । पक्राउ पूर्जी जारी भएपछि ककनी गौरीवन सहकारी संस्थाका अध्यक्ष, उपाध्यक्ष तथा सञ्चालक समितिका पदाधिकारीहरु फरार भएका थिए । सहकारी अन्य सञ्चालक समितिका पदाधिकारी अझै फरार छन् ।
यसै क्रममा जिल्ला प्रहरी कार्यालय ओखलढुंगाले शुक्रबार एक सुचना जारी गरी यस सहकारी संस्थाबाट कोही ठगीमा परी पीडित भएको भए जाहेरी दर्खास्त दिन अनुरोध गरेको छ । ठगिमा परेकाले उजुरी दिन बाँकी कोही भए जिल्ला प्रहरी कार्यालयमा सम्पर्क गर्न प्रहरीले अनुरोध गरेको छ ।

सम्बन्धीत थप समाचार