ओखलढुंगामा स्थानीय तहबीच असल अभ्यास आदानप्रदान

जिल्ला समन्वय समिति ओखलढुंगाको आयोजनामा भएको स्थानीय तहको वार्षिक समीक्षा तथा असल अभ्यास आदानप्रदान कार्यक्रममा जिल्लाभरका आठै स्थानीय तहले आफ्नो उदाहरणीय काम प्रस्तुत गरेका छन् ।

सिद्धिचरण नगरपालिकाले निःशुल्क मुटुरोग शिविर, खिजीदेम्बा गाउँपालिकाले विद्यालयमा पोषणयुक्त दिवा खाजा, लिखुले निःशुल्क एम्बुलेन्स, चम्पादेवीले कृषिमा यान्त्रिकीकरण, चिशंखुगढीले अन्तरजातीय विवाह प्रोत्साहन, मानेभञ्ज्याङले शैक्षिक महोत्सव, मोलुङले नवजात शिशुका लागि नोमिनल खाता, र सुनकोशीले विपन्न नागरिकका लागि आर्थिक सहयोगलाई असल अभ्यासका रूपमा प्रस्तुत गरेका छन् ।

कार्यक्रममा संघीय सांसद रामहरी खतिवडा, संविधानसभा सदस्य यज्ञराज सुनुवार, प्रदेश सांसद प्रदिप सुनुवार र बाबुराम गौतमले एकताबद्ध भई विकासमा लाग्न सम्पुर्णलाई आग्रह गरेका छन् ।

अनुभव आदानप्रदानले पालिकाबीच सकारात्मक प्रतिस्पर्धा र सहकार्य बढाउने विश्वास गरिएको जिल्ला समन्वय समिति प्रमुख टेकराज भट्टराईले बताए ।