ओखलढुंगाका पाँच वटा स्थानिय तहमा ६८ हजार पशुलाई महामारी रोग विरुद्धको खोप लगाइएको छ । करिब एक महिनाको अवधिमा जिल्लाका आठ स्थानिय तह मध्ये पाँच वटामा ६८ हजार १९५ घरपालुवा पशु चौपायालाई महामारी रोग विरुद्धको खोप लगाइएको हो ।

सिद्धिचरण नगरपालिका, चिशंखुगढी, सुनकोशी, चम्पादेवी र लिखु गाउँपालिकाका किसानले पालेका पशुचौपायालाई खोप लगाईएको भेटेरीनरी अस्पताल तथा पशु सेवा विज्ञ केन्द्र ओखलढुंगाका सूचना अधिकारी धिरेन राईले बताए । बाँकी मानेभञ्ज्याङ, मोलुङ र खिजिदेम्बा गाउँपालिकामा पनि खोप अभियान सञ्चालनको तयारी भईरहेको राईको भनाई छ ।

पशुहरुलाई पीपीआर, खोरेत र क्लासिकल स्वाइन फिभर विरुद्धको खोप लगाइएको छ । ४२ हजार पशुलाई पीपीआर, २४ हजार ९७० लाई खोरेत र एक हजार २२५ पशुलाई क्लासिकल स्वाइन फिभर विरुद्धको खोप लगाइएको सूचना अधिकारी राईले जानकारी दिए ।

सिद्धिचरण नगरपालिकामा नौं हजार ५०० लाई पीपीआर, चार हजारलाई खोरत र ६२५ पशुलाई क्लासिकल स्वाइन फिभर विरुद्धको खोप लगाइएको छ । चम्पादेवी गाउँपालिकामा आठ हजारलाई पीपीआर, आठ हजारलाई खोरत र १०० वटा घरपालुवा पशुलाई क्लासिकल स्वाइन फिभर विरुद्धको खोप लगाइएको विवरण छ ।

सुनकोशी गाउँपालिकामा आठ हजारलाई पीपीआर, तीन हजार ३५० लाई खोरत र १०० पशुलाई क्लासिकल स्वाइन फिभर विरुद्धको खोप लगाइएको छ ।

यस्तै लिखु गाउँपालिकामा आठ हजार ५०० लाई पीपीआर, दुई हजार ६२० लाई खोरत र १०० पशुलाई क्लासिकल स्वाइन फिभर विरुद्धको खोप लगाइएको छ । चिशंखुगढी गाउँपालिकामा आठ हजारलाई पीपीआर, खोरेत सात हजार र ३०० पशुलाई क्लासिकलन स्वाइन फिभर विरुद्धको खोप लगाइएको कार्यालयले जनाएको छ ।