ओखलढुंगाका सात हजार भन्दा बढी किशोरीलाई क्यान्सर विरुद्धको खोप लगाउने तयारी गरिएको छ । पाठेघरको मुखको क्यान्सर विरूद्ध लगाइने एचपीभी खोप अभियानको सबै तयारी पूरा भएको जिल्ला स्वास्थ्य कार्यालय रुम्जाटार ओखलढुंगाले जनाएको छ ।

माघ २२ देखि फागुन ६ गते सम्म कक्षा ६ देखि १० कक्षामा अध्ययनरत छात्रा तथा विद्यालय नजाने १० बर्ष देखि १४ वर्ष उमेर समूहका किशोरीलाइ एचपीभी खोप लगाईने जिल्ला स्वास्थ्य कार्यालयका प्रमुख कर्मचन्द्र राजवंशीले बताए । अभियानका रुपमा खोप कार्यक्रम सञ्चालन गर्न स्वास्थ्यकर्मीलाई आवश्यक प्रशिक्षण दिने काम भएको प्रमुख राजवंशीले जानकारी दिए । जिल्लाका सात हजार २०१ जना किशोरीलाई खोप लगाइने रावंशीको भनाई छ ।

खोप सुरक्षित रहेकाले ढुक्कसँग खोप अभियानमा सहभागी हुन प्रमुख राजवंशीले आग्रह गरेका छन् । किशोरावस्थामै खोप दिन सकेमा पाठेघरको मुखको क्यान्सरबाट धेरै महिलालाई जोगाउन सकिने भएकाले अभियानलाई सफलतापुर्वक सम्मन गर्नका लागि सबैको सहयोग आवश्यक पर्नेमा उनको जोड छ ।

जिल्लाका १३४ विद्यालयको खोप केन्द्रबाट किशोरीहरुलाई खोप लगाईने र छुटेकाहरुलाई स्वास्थ्य चौकीहरुबाट पनि खोप प्रदान गरिने खोप फोकल पर्सन उमा गुरुङले जानकारी दिईन् । अभियानलाई सफल बनाउन आ–आफ्नो क्षेत्रबाट सक्दो सहयोग गर्न सम्पुर्ण सरोकारवालाहरुलाई कार्यालयले आग्रह गरेको छ ।