२२ वर्षको युवा अवस्थामा परदेशीयका साविक रागादिप गाउँ विकास समिति हाल मोलुङ गाउँपालिका–८ का खरबहादुर राई ७१ वर्षको वृद्ध अवस्थामा घर फर्किएका छन् । २०३२ सालमा परदेश लागेका राई ४९ वर्ष पछि घर फर्किएका हुन् ।
रोजगारीको शिलशिलामा धरान, काठमाण्डौ, पोखरा, स्याङ्जा, लुम्ले, त्रिशुली हुदै लम्जुङ पुगेका राई ४९ वर्ष पछि गाउँ फर्किएका हुन् । राई लामो समय सम्म लमजुङ जिल्लाको राईनाथ नगरपालिका–१ मा ज्याला मजदुरी गरेर बसेका थिए । उनको अवस्था कमजोर बन्दै गएको थियो ।
राई लम्जुङ जिल्लामा रहेको र गाउँ फर्किन चाहेको बारे सिन्धुलीको फिक्कल गाउँपालिका–६ का दिल राईले भिजन एफएम ओखलढुंगालाई खबर गरेका थिए । लम्जुङको राईनाथ नगरपालिका–१ का साथी मार्फत खरबहादुरको बारेमा जानकारी पाएका राईले भिजन एफएमलाई खबर गरेका हुन् ।
खरबहादुरको अवस्था बारे भिजन एफएमले मोलुङ गाउँपालिका–८ राँगादिपका वडाअध्यक्ष सुधिर राईलाई जानकारी गराएको थियो । त्यसपछी राईनाथ नगरपालिका–१ लम्जुङका वडाअध्यक्ष विष्णु प्रसाद पौडेल र नेपाल प्रहरी र स्थानियको समन्वयमा राईलाई उद्धार गरी ओखलढुंगाको रागादिप घर ल्याईएको वडाअध्यक्ष सुधिर राईले बताए ।
उनलाई परिवारको जिम्मा लगाईएको वडाअध्यक्ष राईले जानकारी दिए । अहिले कागजात मिलाएर खरबहादुर राईलाई सामाजिक सुरक्षा भत्ता दिलाउने प्रक्रिया थालिएको वडाअध्यक्ष राईले जानकारी दिएका छन् । राईकाे बाबु आमाकाे निधन भईसकेकाे छ । हाल उनी भाईकाे घरमा बसेका छन् ।