नेपाली सेनाकाे दुर्गा बक्स गण ओखलढुंगाले सोलुखुम्बुको दुधकुण्ड मेलामा राखेको स्वास्थ्य शिविरमा ८३ जनाले सेवा लिएका छन् । जनैपुर्णिमाको अवसरमा सोमबार दुधकुण्ड मेलामा शिविर राखेर दर्शनार्थीलाई गणले स्वास्थ्य सेवा प्रदान गरेको हो ।

शिविरमा ४८ जना पुरुष, ३२ जना महिला र तीन जना विदेशी नागरिकले स्वास्थ्य जाँचलगायतको सेवा लिएको दुर्गा बक्स गण ओखलढुंगाका गणपति विजय प्रकाश आङदेम्बेले भिजनलाई जानकारी दिए । दुधकुण्ड मेलामा बर्षेनी सैयौँ दर्शनार्थी पुग्ने गरेको र मेलामा वृद्धवृद्धा पनि धेरै हुने तथा ‘हाई अल्टिच्युड’को कारण लेक लागेर स्वास्थ्य समस्या देखिनसक्न जोखिम कम गर्न गणले  प्रहरी, प्रशासन, पालिका र  अस्पतालसँगको समन्वयमा शिविर सञ्चालन गरेको गणपति आङदेम्बेको भनाई छ ।

नेपाली सेनाका जवानहरुले ८३ बर्षीय वृद्ध जगत बहादुर बिष्टलाई बाेकेरै कुण्ड दर्शन गराएका छन् । सिन्धुपाल्चोकबाट दुधकुण्ड दर्शनको लागि आएका बिष्टलाई अशक्तताका कारण दुधकुण्ड पुग्न नसक्ने अवस्था देखिएपछि सेनाको टोली बोकेरै कुण्डसम्म लगेकाे थियाे ।

अघिल्लो बर्ष पनि गणले शिविर राखेर दर्शनार्थीलाई सेवा प्रदान गरिएकाे र यस बर्ष पनि दर्शनार्थी र आम नागरिकको सेवाका लागि शिविर सञ्चालन गरिएको सेनाले जनाएकाे छ ।

धार्मिक महत्व बोकेको प्राकृतिक सुन्दरताले भरिएको दुधकुण्डमा हरेक बर्ष जनै पूर्णिमाको अवसरमा लाग्ने मेलामा सोलुखुम्बु, ओखलढुंगा, खोटाङ, उदयपुर, सिन्धुली, रामेछाप, दोलखा, सिन्धुपाल्चोक लगायत जिल्लाका सैयौँ दर्शनार्थी दुधकुण्ड पुग्ने गरेका छन् ।

सोमबार पनि सैयौ दर्शनार्थीले दुधकुण्डको दर्शन गरेका छन् ।

जनैपूर्णिमाकाे अवसरमादुधकुण्ड, चाँगेस्थानसहितका विभिन्न शक्तिपिठमा मेला लागेकाे थियाे ।