ओखलढुंगाको सुनकोशी गाउँपालिकामा नमुना युवा गाउँ सभा अभ्यास गरिएको छ । सुनकोशी गाउँपालिकाको आयोजना र राष्ट्रिय युवा परिषदको समन्वयमा फागुन गत मंगलबार देखि नमुना युवा गाउँ सभा प्रशिक्षण तथा अभ्यास गरिएको थियो ।
कार्यक्रममा पालिका भित्रका १० वटै वडाबाट छनोट भएर आएका ३१ जना युवालाई नमुना युवा गाउँसभा अभ्यास बारे प्रशिक्षण दिइ अभ्यास गराइएको गाउँपालिकाका शिक्षा शाखा प्रमुुख विवेक कुमार तामाङले बताए ।
नमुना गाउँसभा अभ्यासमा गाउँसभाका सदस्यहरूको निर्वाचन विधिबाट हुने छनोट, गाउँपालिका अध्यक्ष, उपाध्यक्ष, वडा अध्यक्ष, वडा सदस्य, कार्यपालिका सदस्यहरूले खेल्ने भूमिका, नीति तथा कार्यक्रम प्रस्तुति लगायतको अभ्यास गराईएको तामाङले जानकारी दिए ।
यस्तै बजेट प्रस्तुति, योजनाहरू संकलन, छनोट, वडा समितिमा छलफल तथा पालिकामा पेश गर्ने, बजेटमाथिको दफादार छलफल, विषयगत समितिहरूबीच छलफल, बजेट पारित लगायतका विषयमा सैद्धान्तिक तथा व्यवहारिक अभ्यास गराइएको थियो ।