ओखलढुंगामा बाल यौन दुर्व्यवहार मुद्दामा एक प्रधानाध्यापकलाई नौ महिना कैद सजायको फैसला भएको छ । जिल्लाको मोलुङ गाउँपालिका–२ को गणेश माध्यमिक विद्यालयका प्रधानाध्यपक योगेन्द्र प्रसाद धमलालाई नौ महिना कैद सजाय तोकिएको हो ।

२ विद्यार्थी बालिकालाई यौन दुर्व्यवहार गरेको कसुरमा धमला विरुद्ध मुद्दा दायर भएको थियो । ओखलढुङ्गा जिल्ला अदालतका न्यायाधिश टिकाराम आचार्यको ईजलासले आफुले पढाएका विद्यार्थी बालिकालाई यौन दुर्व्यवहार गर्ने धमलालाई नौ महिना सजाय फैसला गरेको श्रेस्तेदार विनोदकुमार घिमिरेले बताए । कैद सजायसहित धमलालाई ५० हजार क्षतिपुर्ति र २० हजार जरिवाना समेतको फैसला भएको छ ।

गत चैत ३ गते बालिकाका आफन्तले प्रधानाध्यापक विरुद्ध प्रहरीमा बाल यौन दुर्व्यवहार गरेको आरोपमा जाहेरी दिएका थिए । उजुरी पश्चात प्रहरीले पक्राउ गरेको धमलालाई जिल्ला अदालतले साधारण तारेखमा छोडेको थियो ।

साधारण तारेखमा छुटेपछि विद्यालयको नियमित काममा फर्किएका धमलालाई ओखलढुङ्गा जिल्ला अदालतले साउन २९ गते न्यायधिश आचार्यको ईजलासले नौ महिना कैद सजायको फैसला गरेको हो ।

धमलाको जागिरको विषयमा फैसलामा केही उल्लेख भएको छैन ।