भदौरेकाे वृद्ध दम्पतीकाे हत्या आराेपमा मगर दाजुभाइ यसरी पक्राउ परे!

ओखलढुंगाको चिशंखुगढी गाउँपालिका–६ भदौरेस्थित बोहोरे टोलमा लुटपाटपछि विभत्स रूपमा हत्या गरिएका वृद्ध दम्पत्तिको घटनामा संलग्न रहेको आरोपमा प्रहरीले दुई जनालाई पक्राउ गरेको छ । करिब दुई हप्ता अघिको उक्त घटनाले सिंगो गाउँलाई त्रासमा पारेको थियो ।

माघको तेस्रो साता ८१ वर्षीय चन्द्र विक्रम राई र उनकी ८० वर्षीया श्रीमती चन्द्रमाया राई आफ्नै घरभित्र लुटपाटपछि हत्या गरिएकाे अवस्थामा फेला परेका थिए । घरमै हत्या भएपछि स्थानीयमा असुरक्षाको गहिरो भावना फैलिएको थियो ।

दुईदिन अघि प्रहरीले साेही गाउँका मगर थरका दुई दाजुभाइलाई काठमाडौंबाट पक्राउ गरी जिल्लामा ल्याएर अनुसन्धान गरिरहेको छ । पक्राउ पर्नेमा ३४ वर्षीय दाइ र करिब १७ वर्षीय नाबालक भाइ रहेका छन् । प्रहरीका अनुसार प्रारम्भिक अनुसन्धान जारी रहेकाले हाल उनीहरूको नाम र विस्तृत विवरण सार्वजनिक गरिएको छैन ।

स्थानीय स्रोतका अनुसार ती दाजुभाइ सानै उमेरदेखि काठमाडौं क्षेत्रमा बसोबास गर्दै आएका थिए । राई दम्पत्तिको हत्या भएको समयमा उनीहरू गाउँमा आएको र घटनापछि अचानक सम्पर्कविहीन बनेको तथ्य बाहिरिएको छ । स्रोतका अनुसार उनीहरू घटनापछि ओखलढुंगाबाट खोटाङ हुँदै काठमाडौं पुगेका थिए । उनिहरुकाे शंकास्पद गतिविधीलाई प्रहरीले नजिक बाट नियाली रहेकाे थियाे ।

पक्राउ परेका दाजु वैदेशिक रोजगारीका लागि मलेसिया गएर फर्किएका व्यक्ति हुन् । स्थानीयवासीले उनीहरूको गतिविधि र पृष्ठभूमि शंकास्पद देखिएको बताउँदै घटनामा अन्य व्यक्तिको समेत संलग्नता हुन सक्ने आशंका व्यक्त गरेका छन् । प्रहरीले यो सम्भावनालाई नकारेको छैन र सबै कोणबाट अनुसन्धान भइरहेको जनाएको छ ।

वडा सचिव चेलेन्द्र कार्कीका अनुसार घटनामा संलग्न भएको आरोपमा दुई जनालाई पक्राउ गरिएको खबरपछि गाउँमा केही हदसम्म शान्ति कायम भएको छ । यद्यपि, स्थानीय अझै पूर्ण रूपमा सुरक्षित महसुस गर्न नसकेको उनको भनाइ छ ।

भदौरे क्षेत्र पछिल्लो समय लगातार हत्याका घटनाले चिन्ताको केन्द्र बनेको छ । यसअघि करिब डेढ महिनाअघि सोही क्षेत्रमा शोभितमान थापामगर र उनकी श्रीमती रत्नमाया थापामगरको पनि लुटपाटपछि हत्या भएको थियो । त्यसअघि सिद्धिचरण नगरपालिका–४ चार्खुमा ५२ वर्षीया एकल महिलाको हत्या भएको थियो । उक्त घटनामा संलग्न आरोपमा चार जना पक्राउ परेर अनुसन्धान भइरहेको अवस्थामा पुनः राई दम्पत्तिको हत्या भएको हो ।

अनुसन्धान अनुसार तीनै घटनामा लुटपाटपछि हत्या गरिएको समान शैली देखिएको छ । मृतक मगर दम्पती र राई दम्पती दुवैले गाउँमा साना किराना पसल सञ्चालन गर्दै आएका थिए ।

लगातारका श्रृंखलाबद्ध हत्या घटनाले ओखलढुंगाबासीमा गहिरो त्रास पैदा गरेको छ । जिल्लाका राजनीतिक दल, नागरिक समाज तथा सरोकारवालाहरूले दोषीलाई छिटोभन्दा छिटो पक्राउ गरी कडा कारबाही गर्न र ग्रामीण क्षेत्रमा सुरक्षा व्यवस्था मजबुत बनाउन माग गरेका छन् ।