पहिरे खोलामा पक्की पुल बन्ने निश्चीतः वर्षौँको पिरलो अन्त्य हुने संकेत

ओखलढुंगाको चर्चित पहिरे खोलामा दुई वर्ष भित्र पक्की पुल बन्ने पक्का भएको छ । भौतिक पूर्वाधार विकास कार्यालय ओखलढुंगा र यती निर्माण सेवा सोलु दुधकुण्ड नगरपालिका–५, सल्लेरीबीच सोमबार औपचारिक रूपमा ठेक्का सम्झौता सम्पन्न भए सँगै पहिरे खोलामा पक्की पुल बन्ने निश्चीत भएको हो ।

कार्यालय प्रमुख गंगा सागर यादव र निर्माण कम्पनीका प्रतिनिधि आङ दावा शेर्पाबीच हस्ताक्षर भएको उक्त सम्झौता अनुसार अबको दुई वर्षभित्र ४० मिटर लम्बाइ र ८.४ मिटर चौडाइको मोटरेबल पक्की पुल निर्माण हुनेछ । कुल लागत करिब ३ करोड ७२ लाख ६६ हजार रुपैयाँ (भ्याटसहित)मा सम्झाैता गरिएको छ ।

हाल वर्खाको समय भएकाले निर्माण कार्य कार्तिक महिनाबाट सुरु गरिने जनाइएको छ । पुलको काम सुरु हुनेबित्तिकै पहिरो नियन्त्रण सम्बन्धी कार्य समेत एकैसाथ अघि बढाइने प्रमुख यादवले बताए ।

कोशी प्रदेश सरकारले पुल निर्माणका लागि ५ करोड रुपैयाँ बजेट विनियोजन गरिसकेको छ । पक्की पुल निर्माण सँगै आसपासका जिल्ला सदरमुकाम देखी पश्चीम भेगका स्थानीय तहका नागरिकलाई सुरक्षित र सहज यातायात सेवा पुग्ने अपेक्षा गरिएको छ ।

दशकौँदेखि अस्थायी र जोखिमपूर्ण यात्रा गर्दै आएका सर्वसाधारणका लागि यो पुल निर्माण एक ऐतिहासिक उपलब्धिका रूपमा हेरिएको छ । पहिरे खोलाले बर्खाको समयमा नागरिकलाई सास्ती दिने गरेको छ ।

यद्यपि, निर्माणको क्रममा देखिने ढिलासुस्ती, प्राविधिक चुनौती तथा पर्यावरणीय जोखिम समाधान गर्न सम्बन्धित निकायहरू समयमै सक्रिय हुन आवश्यक देखिन्छ । उक्त पुल निर्माणकाे याेजना पार्न संघ, प्रदेशका सांसद साथै स्थानिय सरकाकार सँग नागरिकहरुबाट बारम्बार माग भईरहेकाे थियाे ।