ओखलढुंगा पशुपालनमा आत्मनिर्भर

ओखलढुंगा जिल्लाले पशुपालन क्षेत्रमै ५५ करोडभन्दा बढीको उत्पादन गर्न सफल भएपछि कृषिमा आधारित ग्रामीण अर्थतन्त्र बलियो बन्दै गएको संकेत देखिएको छ । आर्थिक वर्ष २०८१/८२ मा जिल्लाभरि करिब ५५ करोड ४३ लाख रुपैयाँ बराबरको दुध, मासु, अण्डा र ऊन उत्पादन भएको भेटेरिनरी अस्पताल तथा पशु सेवा विज्ञ केन्द्र ओखलढुंगाले जनाएको छ ।

पशुपालन व्यवसायमा जिल्लाको आत्मनिर्भरता बढ्दै गएको देखिन्छ । केन्द्रका सूचना अधिकारी धिरेन राईका अनुसार, जिल्लामा दुध उत्पादन मात्रै १७ हजार ३९३ मेट्रिक टन पुगेको छ । मासु पाँच हजार ४२८.१३ मेट्रिक टन उत्पादन भएको छ । त्यस्तै, अण्डा एक लाख ३९ हजार ७०० वटा र ऊन पाँच हजार ६५० किलोग्राम उत्पादन भएको छ ।

जिल्लामा दुधालु गाई १५ हजार ४० वटा र दुधालु भैँसी १० हजार ६५२ वटा रहेका छन् । यी पशुहरूबाट क्रमशः ५ हजार ७९१ र ११ हजार ६०२ मेट्रिक टन दुध उत्पादन भएको हो ।

उत्पादन बढे पनि बजार व्यवस्थापन अझै चुनौतीपूर्ण अवस्थामा छ । हाल जिल्लाबाट मासु काठमाडौं, सिराहा लगायतका जिल्लामा निर्यात हुने सूचना अधिकारी राईले बताए । बजार पूर्वाधार, चिस्यान केन्द्र, दुग्ध सङ्कलन केन्द्र विस्तार र पशु स्वास्थ्य सेवा अझ प्रभावकारी बनाउन सके यो क्षेत्र ग्रामीण समृद्धिको आधार बन्न सक्ने जानकारहरुको भनाई छ ।