लिखु गाउँपालिकाको भवन निर्माणसम्बन्धी विवादमा सर्वोच्चको छीनोफानो, भवन चुवाडाँडामै बन्ने

ओखलढुंगाको लिखु गाउँपालिकाको प्रशासकीय भवन निर्माणसम्बन्धी लामो समयदेखि चल्दै आएको विवादमा सर्वोच्च अदालतले बुधबार अन्तिम छीनोफानो गरेको छ । सर्वोच्चले दायर मुद्दा खारेज गरेसँगै भवन गाउँपालिकाको वर्तमान कार्यालय रहेको चुवाडाँडामै निर्माण हुने पक्का भएको हो ।

लिखु गाउँपालिकाको प्रशासनिक भवन कहाँ बनाउने भन्ने विषयमा विगत लामो समय देखि नै विवाद रहँदै आएको थियो । तत्कालीन अध्यक्ष गोविन्द पौडेलको कार्यकालमा वडा नम्बर ५ मा स्थानीयसँग करिब १० रोपनी जग्गा खरिद गरिएको भए पनि त्यही स्थानमा भवन बनाउने निर्णय कार्यपालिकाबाट नभएपछि विवाद चर्किएको थियो ।

गाउँपालिकाले भवन (हाल पालिका भवन भएको स्थान) चुवाडाँडामै निर्माण गर्न लागेपछि असन्तुष्ट स्थानीयहरूले उच्च अदालत विराटनगर, अस्थायी इजलास ओखलढुंगामा मुद्धा दायर गरेका थिए । सो मुद्धामा अदालतले गाउँपालिकाको पक्षमा फैसला गर्दै चुवाडाँडामै भवन बनाउन दिने निर्णय गरेको थियो ।

त्यसको आधारमा गाउँपालिकाले बैशाख २६ गते शिलान्यास गरी भवन निर्माण कार्य सुरु गरेको थियो । तर पुनः ‘नाम अर्को ठाउँको देखाएर निर्माण चुवाडाँडामा गरिएको’ भन्दै असन्तुष्ट पक्ष सर्वोच्च अदालत पुगेका थिए । सर्वोच्चले सो मुद्दामा असार ८ गते बहस सुनेपछि असार १८ गते बुधबार न्यायाधीशद्वय शारङ्गा सुवेदी र टेकप्रसाद ढुङ्गानाको संयुक्त इजलासबाट मुद्दा खारेज गर्ने फैसला सुनाएको थियो ।

अब ढुक्क संग प्रशासनिक भवनको निर्माण कार्य निरन्तर अघि बढ्ने गाउँपालिका अध्यक्ष अशोक कुमार कार्कीले बताए । हाल भवन निर्माण कार्य सुरु भइसकेको छ ।

आरोहण बिल्डर्स निर्माण कम्पनीले चार करोड ३२ लाख ७७ हजार ६५३ रुपैयाँ ५२ पैसामा ठेक्का लिएको छ । यो भवन स्थानीय पूर्वाधार विकास कार्यक्रमको ६० प्रतिशत तथा गाउँपालिकाको ४० प्रतिशत साझेदारीमा निर्माण हुँदैछ । दुई वर्षभित्र सम्पन्न गर्ने गरी निर्माण कम्पनीसँग सम्झौता गरिएको गाउँपालिकाले जनाएको छ ।