ओखलढुंगाबाट आठ गर्भवती तथा सुत्केरीको हेलिकोप्टरमार्फत उद्धार

ओखलढुंगा जिल्लामा दुर्गम भौगोलिक अवस्थाका कारण समयमै उपचार नपाउँदा ज्यान जोखिममा पर्ने अवस्थालाई मध्यनजर गर्दै आठ जना गर्भवती तथा सुत्केरी महिलाको हेलिकोप्टर मार्फत उद्धार गरिएको छ ।

जिल्ला प्रशासन कार्यालय ओखलढुंगाका अनुसार राष्ट्रपति महिला उत्थान कार्यक्रम अन्तर्गत चालु आर्थिक वर्षको साउनदेखि माघ मसान्तसम्म आठ जनाको हवाई उद्धार गरिएको हो । ज्यान जोखिममा रहेका ती महिलालाई सुविधासम्पन्न अस्पतालमा उपचारका लागि तत्काल स्थानान्तरण गरिएको प्रशासनले जनाएको छ ।

यो सेवा महिला, बालबालिका तथा ज्येष्ठ नागरिक मन्त्रालय अन्तर्गत सञ्चालित दुर्गम क्षेत्रका गर्भवती तथा सुत्केरी महिलाको हवाई उद्धार तथा उपचार कार्यक्रममार्फत प्रदान गरिएको हो ।

प्रशासनका अनुसार स्थानीय तहका अध्यक्ष–उपाध्यक्ष, महिला स्वास्थ्य स्वयंसेविका तथा स्वास्थ्य संस्थाका कर्मचारीको सिफारिस र सूचनाका आधारमा मन्त्रालय र गृह मन्त्रालयबीच समन्वय गरी तत्काल हवाई उद्धार गरिने व्यवस्था रहेको छ ।

दुर्गम गाउँमा आकस्मिक जटिल अवस्था सिर्जना हुँदा सडक पहुँच र स्वास्थ्य सेवा अभावका कारण मातृमृत्यु दर बढ्ने जोखिम रहने गर्दछ। यस्ता अवस्थामा तत्काल हवाई उद्धारले जोखिम न्यूनीकरणमा महत्वपूर्ण भूमिका खेलेको प्रशासनको दाबी छ ।

जिल्लामा मातृस्वास्थ्य सुरक्षालाई प्राथमिकतामा राख्दै कार्यक्रम प्रभावकारी बन्दै गएको जनाइएको छ। स्थानीयवासीले समेत दुर्गम क्षेत्रमा जीवनरक्षा गर्ने यस्ता कार्यक्रमलाई निरन्तरता दिनुपर्ने बताएका छन् ।