लिखुः राष्ट्रपति रनिङ शिल्डको उपाधि ग्रामोदय युगकवि सिद्धिचरण माविलाई

ओखलढुंगाको लिखु गाउँपालिकामा सम्पन्न सातौँ गाउँपालिका स्तरीय राष्ट्रपति रनिङ शिल्ड प्रतियोगिताको उपाधि ग्रामोदय युगकवि सिद्धिचरण माध्यमिक विद्यालय लिखु–६ ले जितेको छ ।

प्रतियोगितामा १२ स्वर्ण, दुई रजत र पाँच कास्य गरी कुल १९ पदक प्राप्त गर्दै ग्रामोदय युगकवि सिद्धिचरण मावि पहिलो स्थानमा रहन सफल भएको हो । यस्तै जनजीवन माध्यमिक विद्यालय, लिखु–९ वाच्पु (पोकली) ले चार स्वर्ण, छ रजत र १० कास्यसहित कुल २० पदक जित्दै दोस्रो स्थान हासिल गरेको छ । तीन स्वर्ण, आठ रजत र एक कास्यसहित १२ पदक प्राप्त गरेको यसम माध्यमिक विद्यालय लिखु–४ तृतीय भएको छ ।

प्रतियोगितामा आठ वटा माध्यमिक विद्यालय तहका विद्यालयहरूको सहभागिता रहेको थियो । प्रतियोगिताका विजेता विद्यालयका खेलाडीहरूलाई गाउँपालिका अध्यक्ष अशोककुमार कार्कीले शिल्ड तथा पुरस्कार हस्तान्तरण गरेका थिए ।

प्रतियोगितामा प्रथम, द्वितीय र तृतीय हुने विद्यालयलाई क्रमशः ३५ हजार, २५ हजार र १५ हजार रुपैयाँ नगदसहित शिल्ड, मेडल र प्रमाणपत्र प्रदान गरिएको गाउँपालिका शिक्षा शाखाले जनाएको छ ।