सडक मर्मत गरी चाडपर्वमा सहज बनाउन प्रजिअको आग्रह

दशैँ, तिहार लगायतका चाडपर्वमा सवारी आवागमन सहज बनाउन समयमै सडक मर्मत गर्न ओखलढुंगाका प्रमुख जिल्ला अधिकारी मेख बहादुर मंग्रातीले सरोकारवाला निकायलाई आग्रह गरेका छन् ।

चाडपर्वमा सवारीको चाप अत्यधिक हुने भएकाले सदरमुकाम देखि पालिका जाने मुख्य मार्गहरू र विभिन्न स्थानबाट पालिकासम्म जोड्ने सडक तत्काल मर्मत गर्नुपर्ने आवश्यकता प्रजिअ मंग्रातीले औंल्याएका छन् । ग्रामीण भेगका धेरै सडक बिग्रिएका कारण आवागमनमा समस्या देखिएको र समयमै काम सुरु नगरिए यात्रुहरूलाई ठूलो असुविधा हुने प्रजिअ मंग्रातीको भनाई छ ।

साथै उनले चाडपर्वमा यात्रुको चाप बढ्ने भएकाले यातायात व्यवस्थित गर्न, दुर्घटना नियन्त्रणमा ध्यान दिन र सुरक्षात्मक उपायमा कडाइ गर्न सुरक्षा निकायलाई निर्देशन दिएका छन् ।

यसअघि जिल्ला प्रशासन कार्यालयमा चाडपर्वलाई सुरक्षित र मर्यादित बनाउन प्रशासन, सुरक्षा निकाय, स्थानीय तह, सरकारी कार्यालय र सरोकारवालाबीचको बैठकले २२ बुँदे निर्णय गरेको थियो ।

उता, चम्पादेवी गाउँपालिकाले चाडपर्वलाई लक्षित गर्दै सडक मर्मत सम्भार र स्तरोन्नतीको काम गरेको छ ।