शैक्षिक संस्थाविहीन बन्यो ओखलढुंगाको पर्यटकीय ठाडे गाउँ

विश्वको सर्वोच्च शिखर सगरमाथा जाने मुख्य मार्गमा अवस्थित ओखलढुंगाको ठाडे गाउँ पर्यटकीय सम्भावनाका साथ अघि बढ्दै गए पनि शैक्षिक पूर्वाधार भने क्रमशः संकटतर्फ उन्मुख भएको छ ।

सिद्धिचरण नगरपालिका–६ मा पर्ने ठाडे गाउँमा हाल होटल तथा होमस्टेहरू सञ्चालनमा छन् । पर्यटक भित्र्याउने पूर्वाधार विस्तार भइरहेको छ । तर पछिल्लो एक दशककाे अन्तरालमा यहाँका दुई शैक्षिक संस्था बन्द भएका छन् ।

वि.सं. २०७२ सालमा विद्यार्थी संख्या घटेसँगै चाँगेस्थान आधारभूत विद्यालय नजिकैको जन्तरखानी माविमा गाभिएको थियो । सोही आसपासका बस्तीका विद्यार्थी लक्षित गरी निजी लगानीमा स्थापना गरिएको ग्रेस एकेडेमी इङ्लिस स्कुल केही वर्ष सञ्चालनमा रह्यो । स्वीडेन र नर्वेबाट प्राप्त आर्थिक सहयोगमा सञ्चालित उक्त विद्यालय पनि विद्यार्थी अभावका कारण गत चैत महिनादेखि पूर्णरूपमा बन्द भएको विद्यालय व्यवस्थापन समितिका अध्यक्ष हरिकुमार मगरले जानकारी दिए ।

“शुरूको केही वर्ष जन्तरखानी, सोलुखुम्बु, पात्ले, टोड्के लगायत गाउँका विद्यार्थीले विद्यालय भरिभराउ थियो,” उनले भने, “तर पछिल्लो समय अभिभावकहरूले आफ्ना बालबालिकालाई काठमाडौँ, सोलु सल्लेरी र ओखलढुंगा सदरमुकामका बोर्डिङ स्कुलमा पठाउन थालेपछि विद्यार्थी संख्या घट्दै गयो ।”

करीब ३० घरधुरी रहेको ठाडे अहिले पूर्णरूपमा शैक्षिक संस्थाविहीन बनेको छ । सिद्धिचरण नगरपालिका–६ का वडाध्यक्ष मेखबहादुर मगरका अनुसार स्थानीय अभिभावक र निजि विद्यालय सञ्चालकलाई जिम्मेवार बन्न आग्रह गरिएको छ ।

ठाडे जस्ता भौगोलिक रूपमा महत्वका बस्तीमा शिक्षा सुविधा नहुनु गम्भीर चुनौती हो । पर्यटकीय क्षेत्रसँगै शिक्षा क्षेत्रको समान विकास हुन आवश्यक छ ।