ओखलढुंगाको ककनीमा पाँच विदेश परिवारको आर्थिक सहयोगले सुविधासम्पन्न विद्यालय भवन बनेको छ । जिल्लाको सुनकोशी गाउँपालिका–९ ककनीमा नर्वेजियन नागरिकको सहयोगले चम्पादेवी आधारभूत विद्यालयको पाँच कोठे पक्की भवन बनेको हो ।

सोनाम गिर्मी फ्यामिली फाउन्डेशन अन्तर्गत पाँच नर्वेजियन परिवारबाट प्राप्त ६६ लाख सहयोगबाट चार वटा कक्षाकोठा र एक लाइब्रेरी सहितको पाँचकोठे पक्की भवन निर्माण भएको विद्यालय व्यवस्थापन समिति अध्यक्ष सिर्जना सुनुवारले बताइन् ।

भवनको आइतबार सुनकोशी गाउँपालिका अध्यक्ष कमल तामाङ, फाउन्डेशनका अध्यक्ष जाङ्बु छिरीङ शेर्पा र उपस्थित दाता चार नर्वेजियन परिवारद्वारा संयुक्त रुपमा उद्घाटन गरिएको सुनुवारले जानकारी दिइन् ।

यस अघि भवन अभावले पठनपाठनमा असहजता हुने गरेकोमा अव भने सहज हुने उनको भनाई छ । फाउन्डेशन मार्फत दाताहरुले लाइब्रेरीका लागि आवश्यक सम्पुर्ण सामाग्रीसँगै विद्यालर्थीलाई शैक्षिक र खेलकुद सामाग्री पनि सहयोग गरेको विद्यालयले जनाएको छ । कक्षा ८ सम्म अध्ययन अध्यापन हुने विद्यालयमा १५० विद्यार्थी रहेका छन् ।