पहाडी जिल्लाका ग्रामिण क्षेत्रका सामुदायिक विद्यालयमा विज्ञान विषय अध्यापन गराउने शिक्षक भेट्टाउन मुस्किल हुन थालेको छ । एउटा सामुदायिक विद्यालयले ११ पटक विज्ञान विषयका लागि विज्ञापन गर्दा समेत कसैको दरखास्त परेन । उक्त विद्यालयले १२ औं पटक पुनः विज्ञान विषयको शिक्षक आवश्यकता सम्बन्धीको दरखास्त आह्वान गरेको छ ।

ओखलढुङ्गाको चिशङ्खुगढी गाउँपालिका–२ को सरस्वती माध्यमिक विद्यालयले विज्ञान शिक्षकका लागि १२ औं पटक दरखास्त आह्वान गरेको हो । गत असार देखि चैत सम्म १२ पटक दरखास्त आह्वान गरिएको छ ।

११ पटक दरखास्त आह्वान गरिएपनि कसैको दरखास्त नपरेपछी गत विहिबार विद्यालयले बाह्रौ पटक दरखास्त आह्वान गरेको छ । विद्यालयलाई माध्यमिक तह तृतिय श्रेणी करार पदमा विज्ञान विषयको शिक्षक आवश्यकता छ । १८ वर्ष पुरा भई ४० वर्ष ननाघेका शैक्षिक योग्यता पुगेकाले आगामी चैत १३ गते सम्म दरखास्त दिन सूचनामा भनिएको छ ।

यस विषयमा गाउँपालिकाका अध्यक्ष निशान्त शर्माले सामाजिक सञ्जाल फेसबुक मार्फत सरकार सँग गुहार मागेका छन् । “गुहार सरकार गुहार ! १२ पटक सम्म सूचना गर्दा पनि विज्ञान शिक्षक पाइएन, दुर्गम भूगोलका विद्यार्थीहरूले अब बिषय अध्ययन नगर्नु भनेर परिपत्र गरिदिनू ! कि कानुन सुधार गरिदिनु ।” अध्यक्ष शर्माले फेसबुकमा लेखेका छन् ।