ओखलढुंगा सहितका तीन जिल्लामा अब राष्ट्रिय परिचयपत्र सम्बन्धित स्थानीय तहबाट वितरण हुने भएको छ । ओखलढुंगा, सोलुखुम्बु र खोटाङ जिल्लाका स्थानिय तह बाट राष्ट्रिय परिचय पत्र वितरण हुने भएको हो । जिल्ला प्रशासन कार्यालय बाट वितरण हुदै आएको परिचय पत्र सम्बन्धित स्थानिय तहबाट वितरण गरिने भएको छ ।

पालिकाबाटै सेवा सञ्चालनका लागि तीन जिल्लाका स्थानिय तहका एमआईएस अपरेटरहरुलाई तालिम दिइएको राष्ट्रिय परिचयपत्र तथा पञ्जिकरण विभाग, सिंहदरबार काठमाण्डौका निर्देशक तुलसी प्रसाद दाहालले बताए । परिचयपत्र वितरणका लागि अद्यावधिक गर्न आवश्यक पर्ने ल्यापटप, फिंगर प्रीन्ट स्क्यानर, स्मार्ट कार्ड रिडर र यूएसबी हब लगायतका उपकरणहरु पालिकालाई वितरण गरिएको दाहालले जानकारी दिए ।

विभागले ओखलढुंगाका आठ, सोलुखुम्बुका आठ र खोटाङका दश स्थानिय तहका एमआईएस अपरेटर र जिल्ला प्रशासनका कर्मचारीलाई दुई दिने अभिमुखीकरण तथा तालिम दिईएको विभागले जनाएको छ ।