प्रथम रुम्जाटार फुटबल कपको उपाधि मितेरी फुटबल क्लब हिलेपानीले जितेको छ । मंगलबार भएको फाइनल खेलमा जगरबोट फुटबल क्लब रुम्जाटारलाई २–१ गोल अन्तरले हराउदै मितेरी फुटबल क्लबले उपाधि जितेको हो ।

प्रतियोगितामा जगरबोट फुटबल क्लब रुम्जाटार द्वितीय हुँदा सह–आयोजक युनाइटेड क्लब रुम्जाटारले तृतीय भएको छ । मंगलबार नै बिहान भएको प्रतियोगितामा भगवती फुटबल क्लब रुम्जाटारलाई ३–२ गोल अन्तरले हराउँदै सह–आयोजक रुम्जाटार युनाइडेड क्लब तृतीय भएको हो ।

प्रतियोगिताका सर्वाधिक गोलकर्ता मितेरी फुटबल क्लबका खेलाडी राजु राई भएका छन् भने उत्कृष्ट खेलाडी जगरबोट एफसीका प्रकाश श्रेष्ठ र उत्कृष्ट गोल रक्षक मितेरी एफसीकै जोन श्रेष्ठ भएको खेल संयोजक सनम गुरुङले जानकारी दिए ।

प्रतियोगितामा प्रथम, द्वितिय, तृतीय हुने टिमले क्रमश ५० हजार, ३५ हजार र २० हजारको साथमा ट्रफी, मेडल र प्रमाणपत्र प्राप्त गरेका छन् भने उत्कृष्ट हुने खेलाडीलाई पनि आकर्षक पुरस्कार प्रदान गरिएको आयोजकले जनाएको छ ।

विजेता क्लब तथा उत्कृष्ट खेलाडीहरुलाई कार्यक्रमका प्रमुख अतिथि सिद्धिचरण नगरपालिकाका उप–मेयर केदारबाबु बस्नेतले ट्रफी, मेडल, प्रमाणपत्र र पुरस्कार रकम हस्तान्तरण गरेका थिए ।

प्रतियोगिताको साथै चर्चित डान्सर जुनु एसडी लगायतका कलाकारहरुले नृत्य तथा साँगितिक प्रस्तुति दिएका थिए । समापन कार्यक्रमको अवसरमा कलाकार र प्रतियोगिता सञ्चालनको लागि सहयोग पु¥याउने व्यक्ति तथा संस्थालाई सम्मान गरिएको आयोजक समाजका अध्यक्ष शिवदास गुरुङले बताए ।

रुम्जाटार युथ तथा रुम्जाटार कलाकार समाजको आयोजना र रुम्जाटार युनाइटेड क्लबको आयोजनामा सञ्चालन भएको बृहत साँस्कृतिक कार्यक्रम तथा फुटबल प्रतियोगिता हेर्न दर्शकको उल्लेख्य उपस्थिती थियो ।

प्रतियाेगिताकाे गत असोज २ गते कोशी प्रदेशका पूर्व मन्त्री अम्बिरबाबु गुरुङले उद्घाटन गरेका थिए ।