राष्ट्रियस्तरको ब्याडमिन्टन प्रतियोगितामा ओखलढुंगा दुई जना वडा अध्यक्ष विजयी  भएका छन् । संविधान दिवसको अवसरमा पूर्वी चितवन स्पोर्टस क्लब रत्न नगर नगरपालिका–३ चितवनको आयोजनामा भएको प्रतियोगितामा विभिन्न सात विधामध्ये जनप्रतिनिधी तर्फ जिल्लाका दुई वडा अध्यक्षले जित हासिल गरेका हुन् ।

शुक्रबार भएको फाइनल खेलमा ओखलढुंगाको सुनकोशी गाउँपालिका–५ का वडा अध्यक्ष गोविन्दराम तामाङ र मानेभन्ज्याङ गाउँपालिका–५ का वडा अध्यक्ष राम कुमार राईको जोडीले धादिङको गजुरी गाउँपालिका अध्यक्ष गशेणलाल श्रेष्ठ र काठमाण्डौको बुढानीलकण्ठ नगरपालिका–३ का वडा अध्यक्ष राजकुमार श्रेष्ठलाई सोझो सेटमा पराजित गर्दै विजेता बनेका हुन् ।

विजेता बनेसँगै वडा अध्यक्षद्वयको टिमले नगद रु. ३१ हजार १११ को साथमा शिल्ड, मेडल र प्रमाणपत्र प्राप्त गरेका छन् । विजेतालाई बागमती प्रदेशका मुख्यमन्त्री बहादुर सिंह लामा लगायतले पुरस्कार र प्रमाणपत्र प्रदान गरेका थिए ।