ओखलढुंगाको श्रीचौरका समाजसेवी गणेश बहादुर कट्वालले चुच्चेडुङ्गा आधारभूत विद्यालयमा अक्षयकोष स्थापना गरेका छन् । मोलुङ गाउँपालिका ६ का समाजसेवी कट्वालले बुवाको मुख हेर्ने दिनको अवसर पारेर चुच्चेडुङ्गा आधरभुत विद्यालयमा ५१ हजार १ सय ५१ रुपैयाँको अक्षयकोष स्थापना गरेका हुन् ।

आफ्ना दिवंगत बुबा कृष्णबहादुर कट्वालको स्मृतिमा गाउँका बालबालिकाको उज्जवल भविष्यका लागि योगदान गर्दै अक्षयकोष स्थापना गरेको कट्वालले बताए । सामुदायिक विद्यालयमा अध्ययनरत विद्यार्थीहरुको शैक्षिक उन्नयन गर्दै गाउँकै विद्यालयमा दक्ष जनशक्ति उत्पादन गर्नुपर्ने कट्वालको भनाइ छ ।

समाजसेवी कट्वालले यसअघि श्रीचौरको कालिका मावि भालुथुम्कामा समेत अक्षयकोष स्थापना गर्नुभएको थियो । स्थानीय अन्य विद्यालय, सामाजिक संस्था, गुम्बा र मन्दिर निर्माणमा समेत समाजसेवी कट्वालले योगदान गर्दै आएका छन् ।