दुर्गा बक्स गण ओखलढुंगाले दुधकुण्ड मेलामा स्वास्थ्य शिविर सञ्चालन गर्ने भएको छ । जनैपुर्णिमाको अवसरमा भदौ ३ गते सोलुखुम्बुको दुधकुण्डमा लाग्ने मेलामा शिविर राखेर दर्शनार्थीलाई गणले स्वास्थ्य सेवा दिने भएको हो ।

दुधकुण्ड मेलामा बर्षेनी सैयौँ दर्शनार्थी पुग्ने गरेको र मेलामा वृद्धवृद्धा पनि धेरै हुने तथा ‘हाई अल्टिच्युड’को कारण लेक लागेर स्वास्थ्य समस्या देखिनसक्न जोखिम हुन्छ । त्यसैले गणले  प्रहरी, प्रशासन, पालिका र  अस्पतालसँगको समन्वयमा शिविर सञ्चालन र आपतकालिन उद्धारको समेत व्यवस्था मिलाएको दुर्गा बक्स गण ओखलढुंगाका गणपति विजयप्रकाश आङदेम्बेले बताए ।

अघिल्लो बर्ष पनि गणले शिविर राखेर दर्शनार्थीलाई सेवा प्रदान गरेकोले यस बर्ष पनि आम नागरिकको सेवाका लागि शिविर सञ्चालन गरिने उहाँको भनाई छ ।

धार्मिक महत्व बोकेको प्राकृतिक सुन्दरताले भरिएको दुधकुण्डमा हरेक बर्ष जनै पूर्णिमाको अवसरमा लाग्ने मेलामा सोलुखुम्बु, ओखलढुंगा, खोटाङ, उदयपुर लगायत जिल्लाका सैयौँ दर्शनार्थी दुधकुण्ड पुग्ने गरेका छन् ।