ओखलढुंगाको सिद्धिचरण नगरपालिकाले सरोकारवालाबाट आएका सुझावलाई समेटेर विपद् प्रतिकार्य योजना बनाउन थालेको छ । असार १२, १९ र २५ गते सरोकारवालासँग छलफल गरेर नगरपालिकाले विपद पूर्व तयारी तथा प्रतिकार्य योजनाका लागि सुझाव लिएको हो ।

नगरपालिकाको आयोजना र सहयोगी हातहरुको समूह (सहास) नेपाल लिफ्ट परियोजनाको समन्वयमा भएको गोष्ठीबाट अन्तिम मस्यौदा मंगलबार संकलन गरेको हो ।

सरोकारवालाले मस्यौदामा योजनालाई प्रभावकारी बनाउन तंथ्याकलाई पहिलो प्राथमिकता दिनुपर्ने, विपद पछिको प्रतिकार्य भन्दा विपद्का घटना नै हुन नदिनेतर्फ काम गर्नुपर्ने, सम्भावित विपद् आइपर्ने क्षेत्र र समाधानका उपाय सुझाएका छन् ।

विपद् पूर्व तयारी तथा प्रतिकार्य योजना २०८१ को अन्तिम मस्यौदा प्रस्तुति राय सङकलन तथा छलफल गोष्ठीको अन्तिम दिन मंगलबार नगरप्रमुख तेजेन्द्र खनालले नगरपालिकाले साधन र स्रोतले भ्याएसम्म विपद्को क्षेत्रमा काम गरेको बताए ।

विपदका समेकसम्म हुन नदिन र विपद आइपरेक बेला अलमल नहोस भनेर पूर्व तयारी तथा विपद पछिको प्रतिकार्यलाई प्रभावकारी बनाउन आम नागरिक, सुरक्षा निकायका प्रमुख, जनप्रतिनिधि र सरोकारवालाको सुझाव लिइएको उनको भनाई छ ।

यस किसिमको छलफल र योजना निर्माणबाट भोलिका दिनमा विपद्को क्षेत्रमा काम गर्न सहजता आउने मेयर खनालले बताएका छन् ।

गोष्ठीमा कन्सल्टेन्ट निरज काफ्लेले विपद पूर्व तयारी तथा प्रतिकार्य योजना निर्माणका लागि सहजीकरण गरेका थिए । जिल्लामा भएका विपद्का घटना, घटनाबाट भएका क्षति, राहत, उद्धार र प्रतिकार्यको अवस्था र आगामी दिनमा खेल्नुपर्ने भूमिका र कामको विषयमा पनि छलफल भएको सहास नेपालको लिफ्ट परियोजना अधिकृत देवेन्द्र लामा थिङले जानकारी दिए ।

कार्यक्रममा मेयर खनाल, उप–मेयर केदारबाबु बस्नेत, जिल्ला स्थित सुरक्षा निकायका प्रमुख एवम् प्रतिनिधि, विभिन्न सरकारी तथा गैह्र सरकारी कार्यालयका प्रमुख एवम् प्रतिनिधि, नगरपालिकाका सबै वडाका वडा अध्यक्ष, जनप्रतिनिधि, पत्रकार र सरोकारवालाको सहभागिता रहेको थियो ।