चम्पादेवी गाउँपालिका-९ काे जीवनज्याेती माध्यमिक विद्यालयमा आगलागी भएकाे छ । साेही स्थानकाे देविथान सामुदायिक वनमा लागेकाे आगाे विद्यालयमा सल्केको हाे ।

जंगलमा लागेकाे आगाे हावाहुरीको कारण अनियन्त्रित भई विद्यालयको ढुङ्गा माटोले बनेको जस्ताको छानो भएको स्टोर कोठा भित्र आगलागी भएको जिल्ला प्रहरी कार्यालय ओखलढुंगाका प्रहरी निरीक्षक बालिस्टार सिंहले बताए ।

उक्त कोठा भित्र रहेको कम्युटर, डेक्सटप, स्कुल ड्रेस, किताब लगायत विद्यालयका अन्य शैक्षिक सामाग्रिहरु समेत जलि नष्ट हुँदा करिब १० लाख बराबरकाे क्षति भएकाे प्रहरी निरीक्षक सिंहले जानकारी दिए ।

यसैबीच चिशंखुगढी गाउँपालिका-१ आकाशे भिरमा आगलागी भएको र उक्त आगोको झिल्का आई साेही ठाउँका शिव कुमार राईको ढुङ्गामाटोले बनेको एक तले फुसको छानो भएको बाख्राको खोरमा आगलागी हुँदा खोर पुर्णरुपमा जलि नष्ट भएको छ । आगलागीमा मानविय र चौपाय क्षति नभए पनि करिब दुई लाख ५० हजार बरबरको क्षति भएको प्रहरीले जनाएको छ ।