ककनी गौरीवन कृषि सहकारी संस्था लिमिटेड ओखलढुंगाले ८६ लाख बढी रकम ठगी गरेको पाईएको छ । १०१ जना बचतकर्ताको ४६ लाख ८७ हजार ५८६ र युवा तथा साना व्यवसायी स्वरोजगार कोषको ३९ लाख ८५ हजार १३९ रुपैयाँ गरी ८६ लाख ७२ हजार ७२५ रकम ठगी भएको पाईएको हो ।
१०१ जना बचतकर्ता र युवा तथा साना व्यवसायी स्वरोजगार कोषले सहकारीका सञ्चालक विरुद्ध जिल्ला प्रहरी कार्यालयमा परेको आठ वटा जाहेरीका आधारमा ८६ लाख ७२ हजार ७२५ रुपैयाँ रकम हिनामिना भएको पाईएको छ ।
हाल सम्म बचतकर्ता र युवा तथा साना व्यवसायी स्वरोजगार कोषको उजुरीको आधारमा ८६ लाख ७२ हजार ७२५ रुपैयाँ रकम ठगी भएको पाईएको जिल्ला प्रहरी कार्यालयका प्रहरी निरिक्षक बालिस्टार सिंहले बताए । जाहेरी पर्ने र पीडित प्रहरीको सम्पर्कमा आउने क्रम निरन्तर भईरहेकाले ठगी भएको रकम बढ्न सक्ने प्रहरी निरिक्षक सिंहको भनाई छ ।
जिल्ला प्रहरी कार्यालय ओखलढुंगाले एक सुचना जारी गरी यस सहकारी संस्थाबाट कोही ठगीमा परी पीडित भएको भए जाहेरी दर्खास्त दिन अनुरोध गरेको छ । ठगिमा परेकाले उजुरी दिन बाँकी कोही भए जिल्ला प्रहरी कार्यालयमा सम्पर्क गर्न प्रहरीले अनुरोध गरेको हो ।
बचतकर्ताको रकम ठगी गरेको आरोपमा प्रहरीले सहकारी सञ्चालक मध्येका अध्यक्ष, उपाध्यक्ष र कोषाध्यक्षलाई पक्राउ गरेको छ । जिल्लाको चम्पादेवी गाउँपालिका–९ विलन्दु स्थायी घर भएका सहकारीका अध्यक्ष विनोद सुनुवारलाई काठमाण्डौं महानगरपालिका–६ बौद्धबाट र उपाध्यक्ष मोलुङ गाउँपालिका–४ हर्कपुर ओखलढुंगाका पदम बहादुर खत्रीलाई घरैबाट प्रहरीले पक्राउ गरेको हो । यसका साथै सहकारीका कोषाध्यक्ष पाँचथर जिल्ला साबिक इङबुङ गाविस–१ हाल सिद्धिचरण नगरपालिका–१२ भैरबटोल ओखलढुङ्गा बस्ने ४८ वर्षिय नेत्रबहादुर नेम्वाङलाई सिद्धिचरण नगरपालिका–६ जन्तरखानी बाट प्रहरीले पक्राउ गरेको छ । तीनै जना लामो समय देखी फरार रहेका थिए ।
पक्राउ परेकाहरु माथि जिल्ला अदालतबाट थुनामा राखेर अनुसन्धान गर्न ६ दिनको म्याद लिइएको प्रहरी निरिक्षक सिंहको भनाई छ । पक्राउ परेको सहकारीका अध्यक्ष सुनुवार नेकपा माओवादी केन्द्र ओखलढुंगाका जिल्ला सचिव र नेम्बाङ जनता समाजवादी पार्टीका नेता हुन् ।
बचतकर्ता मध्येका तिलक श्रेष्ठले गत मंसिर १५ गते सहकारीका सञ्चालक विरुद्ध जाहेरी दर्ता गर्नुभएको थियो । सहकारी मार्फत ठगीएका बचतकर्ताहरु धमाधम प्रहरीको सम्पर्कमा आउने क्रम बढी रहेको जिल्ला प्रहरी कार्यालय ओखलढुंगाले जनाएको छ ।