सिद्धिचरण नगर स्तरीय राष्ट्रपति रनिङ शिल्ड रुम्जाटार माविले जित्यो

सिद्धिचरण नगर स्तरीय राष्ट्रपति रनिङ शिल्ड रुम्जाटार माविले जित्यो


भिजन समाचार
51.6k
Shares

सिद्धिचरण नगरपालिका स्तरीय राष्ट्रपति रनिङ शिल्ड प्रतियोगिताको उपाधी रुम्जाटार माध्यमिक विद्यालय रुम्जाटारले जितेको छ । प्रतियोगितामा ४९ स्वर्ण, आठ रजत र ११ काश्य गरि ६८ पदक सहित रुम्जाटार माविले उपाधी हात पारेको हो ।

यस्तै १८ स्वर्ण, २६ रजत र छ काश्य गरि ५० पदक सहित लाली गुराँस बाेर्डिङ्ग स्कुल द्वितीय भएको छ । १० स्वर्ण, १६ रजत र तीन काश्य सहित २९ पदक सहित सगरमाथा जनता मावि ओखलढुंगा तृतीय भएको सिद्धिचरण नगरपालिका शिक्षा शाखाले जनाएको छ ।

विजेता विद्यालयका खेलाडीलाई सिल्ड, मेडल, प्रमाणपत्र र पुरस्कार पूर्वमन्त्री अम्बिरबाबु गुरुङको हातबाट हस्तान्तरण गरिएको छ । खेलाडीलाई पुरस्कृत गर्दै समापन कार्यक्रमका प्रमुख अतिथि पुर्वमन्त्री अम्बिरबाबु गुरुङले खेल क्षेत्रको विकास संधै आफ्नो प्राथमिकतामा परेको बताए । यसमा सबै एकजुट हुन आवश्यक रहेको उनको भनाई थियो ।

यस्तै सिद्धिचरण नगरपालिकाका उप–मेयर केदारबाबु बस्नेतले शैक्षिक गुणस्तर सुधार सँगै खेलकुद क्षेत्रको विकासमा पालिकाले सक्दो पहल गर्ने प्रतिवद्धता जनाएका छन् ।

प्रतियोगितामा पालिकाका १८ वटा विद्यालयहरुको सहभागिता थियो । तर सगरमाथा जनता माविले बने खेलमा धाँधली भएको भन्दै शनिबार खेल बहिस्कार गरेको थियो ।

भलिबल, दौड, हाइजम्प, लङ जम्प लगायत विभिन्न विधामा खेलहरु सञ्चालन भएका थिए । खेल रुम्जाटार माविको खेल मैदानमा पुस ४ देखि ७ गते सम्म सञ्चालन भएको थियो ।

खेलक्षेत्रमा युवा विद्यार्थीको क्षमता विकास गर्ने राष्ट्रपति रनिङ शिल्डलाई आगामी दिनमा थप व्यवस्थित र प्रभावकारी बनाइनुपर्ने उपाधी विजेता रुम्जाटार माविका प्रअ गोकर्ण बानियाले बताए । रनिङ शिल्डले विद्यार्थीको खेल तथा व्यक्तित्व विकासमा सहयोग पुग्ने उनको भनाई थियो । रनिङ शिल्डलाई विद्यालय र विद्यार्थी बिचको प्रतिस्पर्धाका रुपमा मात्रै लिन नहुने उनको भनाई छ ।

वर्षेनी आयोजना हुने राष्ट्रपति रनिङ शिल्ड यसवर्ष जिल्लाका अधिकांश पालिकामा भईसकेका छन् ।