ओखलढुंगाको भुसिङ्गामा स्कारपियो दुर्घटना एक जना घाइते भएका छन् । हिजो साँझ सोही वडाको भुसिङ्गा आधारभुत विद्यालयमा रेस्क्यु नेपालद्वारा सञ्चालित शिविर पछि फर्कने क्रममा ब्रेकफेल भई प्रदेश ३–०१–०२ च ८३६९ नम्बरको स्कारपियो दुर्घटना भएको हो ।

ब्रेक फेल भई स्कारपियो सडकमै पल्टिँदा स्कारपियो चालक सुर्खेतको सुन्दा गाउँपालिका– ८ बस्ने अन्दाजी ३४ का वुद्धिलाल लोहारको दाहिने हातको दुई वटा औंलामा चोट लागेको जिल्ला प्रहरी कार्यालय ओखलढुंगाका सूचना अधिकारी प्रहरी निरीक्षक बालिस्टर सिंहले जानकारी दिए ।

उनको अवस्था सामान्य रहेको तर उपचारको लागि काठमाण्डौ जाने तयारी भइरहेको प्रहरी निरीक्षक सिंहले बताए । उनका अनुसार सोही स्कारपियो पछाडि सवार आठ जना व्यक्तिहरु सकुशल छन् ।

दुर्घटनाग्रस्त सवारी साधन घटना स्थलमै रहेकोले हाल सडकमा ठुलो सवारी साधन जान नसक्ने गरि अवरुद्ध रहेको र अवरोध खुलाउने प्रयास भइरहेको जिल्ला प्रहरी कार्यालय ओखलढुंगाले जनाएको छ ।