जिल्ला प्रहरी कार्यालय ओखलढुंगाले विविध कार्यक्रम गरि ६८ औँ प्रहरी दिवस मनाएको छ । एक महिना सम्म दिवसको अवसरमा ओखलढुंगा प्रहरीले विभिन्न कार्यक्रम गरेको थियो । दिवसको अवसरमा भलिबल खेल प्रतियोगिता, ५ कि.मी. दौड, ब्याडमिटन प्रतियोगिता, वृक्षारोपण, सरसफाई लगायत जनचेतनामुलक कार्यक्रम गरिएको थियो ।
मंगलबार जिल्ला प्रहरी कार्यालय ओखलढुंगाको अमर प्रहरी स्मारकमा पुष्प हार अर्पण गरि शोक सलामी अर्पण गरिएको थियो । यस्तै अमर प्रहरी परीवारका तीन जनालाई सम्मान गरियो ।

दिवसको अवसरमा आयोजित कार्यक्रमलाई सम्बोधन गर्दे प्रमुख अतिथि तथा ओखलढुंगाका प्रमुख जिल्ला अधिकारी चेतराज बरालले जिल्लामा शान्ति सुरक्षा, सुशासन र अमनचयन कायम राख्न प्रहरीको भूमिका महत्वपुर्ण रहेकोले आगामी दिनमा थप प्रभावकारी कार्यसम्पादनको लागि निर्देशन दिए । पुरस्कृत हुने गरि काम गर्न प्रजिअ बरालले प्रहरी युनिटहरुलाई पनि निर्देशन दिएका छन् ।

पछिल्लो समय सवारी भाडादरबारे गुनासो बढीरहेकोले यसबारे प्रभावकारी अनुमगन गरि सरकारले तोकेभन्दा बढी भाडा लिएको पाइएमा तत्काल कारबाही गर्न प्रजिअ बरालले ओखलढुंगा प्रहरीलाई निर्देशन दिएका छन् ।
कार्यक्रममा जिल्ला प्रहरी प्रमुख एवम् प्रहरी नायब उपरीक्षक दिपक बहादुर कसीले प्रहरी दिवसलाई कर्तव्य पालनाको क्रममा ज्यान गुमाएका सहिदहरुको सम्मान र सम्झना गर्ने दिनको रुपमा लिइने गरिएको बताएका छन् ।
प्रहरीको एक्लो प्रयासले मात्र समुदायमा अपराध नियन्त्रण, सुशासन र शान्ति सुरक्षा कायम राख्न चुनौति हुने भएकाले प्रहरीलाई सबैको सहयोग महत्वपूर्ण हुने उनको भनाई छ ।

दिवसको अवसरमा निबन्ध तथा खेलकुद प्रतियोगिताका विजेताहरुलाई प्रमुख जिल्ला अधिकारी बराल दुर्गा वक्स गण ओखलढुंगाका गणपति प्रेम बहादुर गिरी तथा जिल्ला प्रहरी प्रमुख केसीले पुरस्कार हस्तान्तरण गरेका छन् ।
दिवसकै अवसरमा उत्कृष्ट प्रहरीलाई नगद पुरस्कार, प्रहरी सन्तति मध्येका उत्कृष्ट जेहेन्दार विद्यार्थीलाई नगद सहित पुरस्कृत गरिएको छ ।
भलिबल, ५ कि.मी. दौड, ब्याडमिटन लागयतका प्रतियोगिताहरुमा विजेताहरुलाई पुरस्कृत गरिएको जिल्ला प्रहरी कार्यालय ओखलढुंगाले जनाएको छ ।