‘समुदायमा नेपाल प्रहरीको भूमिका’ शिर्षकमा एलिसाको निबन्ध प्रथम

जिल्ला प्रहरी कार्यालय ओखलढुंगाले आयोजना गरेको निबन्ध लेखन प्रतियोगितामा लाली गुँरास इंलिस सेकेन्डरी स्कुल ओखलढुंगाकी छात्रा एलिसा थापा प्रथम भएकी छिन् । प्रतियोगितामा सगरमाथा जनता माध्यमिक विद्यालयकी छात्रा कृतिका मगर द्वितीय र कुन्ता मावि ज्यामिरेकी छात्रा भावना खड्का तृतीय भएकी छिन् ।
विजेता तीनै जनालाई असोज ३० गते प्रहरी दिवसको अवसरमा पुरस्कृत गरिने जिल्ला प्रहरी कार्यालय ओखलढुंगाका सूचना अधिकारी एवम् प्रहरी निरीक्षक बालिष्टर सिंहले जानकारी दिए । ६८ औं प्रहरी दिवसको अवसर पारेर आईतबार ‘समुदायमा नेपाल प्रहरीको भूमिका’ विषयमा निबन्ध लेखन प्रतियोगिता गरिएको थियो ।
प्रतियोगितामा १३ वटा विद्यालयबाट दुई छात्र र ११ छात्रा गरि १३ जना विद्यार्थी सहभागि भएका थिए । जिल्लामा प्रथम हुने प्रतियोगिको निबन्ध प्रहरी हेडक्वार्टर पठाइने र त्यहाँ हुने प्रतिस्पर्धामा विजेता बनेमा त्यहाँबाट पनि पुरस्कृत हुने जिल्ला प्रहरी कार्यालय ओखलढुंगाले जनाएको छ ।