कटुन्जे माविमा स्मार्ट हाजिरी सहित शैक्षिक व्यवस्थापनमा डिजिटल प्रणाली लागु

ओखलढुंगाको सुनकोशी गाउँपालिका–९ मा रहेको कटुन्जे माध्यमिक विद्यालयले शैक्षिक प्रशासनमा प्रविधिको प्रभावकारी प्रयोग गर्दै ‘ई–हाजिरी’ प्रणाली सुरु गरेको छ । विद्यालयले शिक्षक तथा विद्यार्थीको हाजिरी प्रणालीलाई पूर्ण रूपमा डिजिटल बनाउँदै प्रविधिमैत्री शैक्षिक वातावरण निर्माणको सुरुवात गरेको हो ।

विद्यालयले सुरु गरेको यो प्रणाली अन्तर्गत विद्यार्थी र शिक्षकहरूले बिहान र बेलुका स्मार्ट आइडी कार्ड ट्याप गरी आफ्नो हाजिरी दिनेछन् । हाजिरी ट्याप भएलगत्तै विद्यार्थीको उपस्थितिको सूचना अभिभावकको मोबाइलमा सन्देश मार्फत पुग्ने व्यवस्था मिलाइएको विद्यालय व्यवस्थापन समिति अध्यक्ष झनककुमार कार्कीले बताए । प्रविधिको प्रयोगले अनुशासन र नियमितता सुनिश्चित गर्दै शैक्षिक गुणस्तरमा ठुलो फड्को मार्ने अपेक्षा गरिएको विव्यस अध्यक्ष कार्कीको भनाई छ । “हामी प्रविधिमैत्री र समावेशी शिक्षाको नमुना बनाउने प्रयासमा छौं,” उनले भने, “सबैको सहयोगले यो सम्भव हुन्छ भन्ने विश्वास छ ।”

विद्यालयका प्रधानाध्यापक कृष्णप्रसाद पुडासैनीले डिजिटल प्रणालीले व्यवस्थापनमा पारदर्शिता, स्रोतको सही सदुपयोग र समयको बचत सुनिश्चित गर्ने बताए । अब शिक्षकले हाजिरी पुस्तिका बोकेर कक्षामा जानु पर्ने बाध्यता हटेको प्रधानाध्यापक पुडासैनीको भनाई छ ।

स्मार्ट हाजिरी मात्र नभई विद्यालयले लेखा व्यवस्थापन, शिक्षक–कर्मचारीको बिदा अभिलेखीकरण, पुस्तकालय सेवा, परीक्षाफल तयारी, सूचना प्रवाह, संवाद संयन्त्र लगायतका कार्यहरू पनि एकीकृत डिजिटल सफ्टवेयर प्रणाली मार्फत सञ्चालन थालिएको छ ।

यस अघि नै विद्यालयले प्रविधिमा आधारित शिक्षण प्रणालीलाई प्राथमिकतामा राख्दै स्मार्ट बोर्ड प्रयोग, व्यवहारिक कम्प्युटर तालिम, बुक–फ्री गुड फ्राइडे कार्यक्रम, स्काउट गतिविधि, शिक्षक तालिम, शैक्षिक भ्रमण, मन्टेश्वरी शिक्षण विधि र क्यान्टिन सञ्चालन जस्ता कार्यक्रम सञ्चालन गर्दै आएको थियो ।