ओखलढुंगामा सम्पन्न नेपाली सेनाको बाहिनीपति ट्रफी प्रतियोगिता–२०८१ को भलिबल तर्फको उपाधी रणभीम गण खोटाङले जितेको छ । बिहीबार सम्पन्न अन्तिम खेलमा दुर्गा बक्स गण ओखलढुंगालाई ३–२ को सेटले हराउँदै रणभिम गणले उपाधी जितेको हो ।
नेपाली सेनाको श्री नं.१८ वाहिनी अड्डा, उदयपुर गाइघाटको आयोजनामा दुर्गा बक्स गण ओखलढुंगामा गत जेठ २० गते देखी प्रतियोगिता सञ्चालन भएको थियो । विजेता खेलाडीलाई प्रमुख जिल्ला अधिकारी डा. नारायण प्रसाद ढकाल र दुर्गाबक्स गणका गणपति प्रमुख सेनानी विजय प्रकाश आङ्देम्बेले मेडल र प्रमाणपत्र हस्तान्तरण गरेका छन् ।

प्रतियोगितामा श्री नं.१८ वाहिनी अड्डा अन्तर्गत ओखलढुंगा, उदयपुर र खोटाङको नेपाली सेनाका गण विच प्रतिस्पर्धा भएको थियो । बाहिनीपति ट्रफी प्रतियोगितामा उत्कृष्ट हुँदै छनौट भएका टिम तथा खेलाडीहरुले ‘पृतनापति ट्रफि प्रतियोगिता’ मा सहभागि हुन पाउने गणपति आङ्देम्बेले बताए ।
‘पृतनापति ट्रफी प्रतियोगिता’ मा उत्कृष्ट हुने टिम र खेलाडीहरुले ‘प्रधानसेनापति ट्रफी प्रतियोगिता’ मा सहभागी हुन पाउने छन् र त्यहाँ पनि उत्कृष्ट हुने क्षमतावान खेलाडीले राष्ट्रिय खेलाडी बन्ने अवसर प्राप्त गर्ने गणपति आङ्देम्बेले जानकारी दिए ।
ओखलढुंगामा भलिबल विधाको प्रतियोगिता भएको हो भने र बाहिनी अड्डा अन्तर्गतका अन्य जिल्लामा फुटबल, बास्केटबल, पौडी, तेक्वान्दो र बक्सिङ लगायत विधाका प्रतियोगिताहरु भएका थिए ।